Kisah Bahasa Banjar Beserta Amanatnya

Beberapa sekolah di Kalimantan Selatan masih banyak yang mempunyai ekskul Bahasa Banjar. Terkadang guru pengajar meminta para pelajarnya mencari cerita dalam bahasa Banjar lengkap dengan amanatnya. Nah karena itu lah saya mau mencoba memposting cerita yang (menurut saya pun) cukup garing namun sarat dengan amanat ini. Semoga bisa membantu ya untuk tugas kalian 

Habis di Hidung

Kisahnya ni kaini. Ada sabuah kaluarga nang miskin banar di Dusun Hujung nang jauh dari kuta. Kapala kaluarganya bangaran Paman Amat. Eh kada tahu nah ulun sidin ni disambat kapala kaluarga atau kada, napang sidin ni kada tapian mau bagawi. Yang bagawi tuh bini sidin pang maambilupah manapasakan baju urang. Amun Paman Amat tu hakun bamasak sidin daripada bagawi. Maka Paman Amat ni kada tapi tahu jua sidin lawan agama, di KTP banar ai batulisan Islam. Kasian haja ah anak bini sidin.

Di rumahnya tuh urangnya batujuh, sidin, bini sidin, lawan anak sidin lima ikung. Anak sidin nang pamulaan nih ngarannya Utuh Gaul, sudah ngaran pina maalay banar kaya ngaran pesbuk, muhanya kada tapi bungas ha pulang. Tahulah buhan pian, Utuh Gaul tu kada gelaraan, ngitu ngaran asli di akta. Han kisah kegaulan banar kalo abahnya ngini, hidup di ujung dusun iya to kisah gaul. Si Utuh Gaul ni kasian haja pang, sangu tu limaratus haja sahari, padahal sudah kalas lima SD. Sudah kada tapian ada baduit, muha kada bungas, awak hirang latat, bantat pulang.

Jadi di hari ngitu si Utuh Gaul ni malihat kawan sakalasnya nang bangaran Udin ni mamaraki binian, bahiri jua inya. Si Udin kawannya Utuh Gaul ni urangnya sugih, putih, bungas ha pulang, jadi binian nang diparakinya ni pina lihum-lihum salang tingkah ai.

Lalu babisik ai Utuh Gaul ka kawannya nang bangaran Anang, “Nang, aku handak jua nang kaya Udin tuh, kaya urang rancak di tipi-tipi tuh, ada kelo sinitrun2 nang rami biasanya tuh” jarnya. Jadi tatawaai Anang. “Hau kanapa ikam tatawa Nang, aku kada balawakan,” jar Utuh. “Kadanya keitu pang Tuh ai. Udin tu bungas, putih, sugih, jadi wajar ai keitu. Nah ikam hirang iya banar lutung handak jua lah memaraki binian?” Ujar Anang banyaring sampai kadangaran urang sakalasan. Lalu tatawaan ai sakalasan mandangar ucapan Anang. Lalu sakalasan umpat maurahakan Utuh, “Utuh hirang kaya lutung, utuh hirang kaya lutung,” jar kakawanannya baimbaian. Tadiam ai Utuh kasasupanan. Handak sarik kada wani jua malawani urang sakalasan. Jadi hari ngitu Utuh badiam aja saharian mulai pagi sampai pambulikan sakulah.

Mbah luncing bulikan sakulah babunyi, bahancapai si Utuh ni bukah-bukah bulik ka rumah.

Di rumah ni Paman Amat lagi mangguringakan anak sidin nang paling halus sambil manyanyiakan supaya mau lakas taguring. Paman Amat ni sadang haja jua pang urangnya. Manggurikan anak tu jaka pang disya’irakan kaya urang bemaulitan rancak tuh kah, atau sambil “Laa ilaaha illallah” kah bagus jua kalo. Ini kada, sambil mangguringakan tuh sambil banyanyi “sudah mabuk minuman, ditambah mabuk judi, masih saja abang tergoda janda kembang…” keitu. Bebaya Anabel tekelap, Utuh gaul masuk ka rumah sambil bukah bakuciak kada sing salam-an, langsung “Abaaaaaaaaaaah..!!” ujarnya. Lalu takalipik ai adingnya tadi, manangis langsung inya takajut. Sarik ai Paman Amat nih, “Utuh ngini datang ka rumah kada behalau-halau hai-hai lagi, jaka pang masuk rumah tu ekskusme kah, dedi em kaming kah, ngini kuciak-kuciak handak manangis kaitu, nih yor sister manangis nah” Ujar Paman Amat kada tetahu muha. “Agak pian nih bah ai, ulun sadih nah, sadih, em so sed, em so sed” ujar Utuh banyanyi lagu Maroon5. “Sadih kanapa pulang ikam Tuh?” Ujar Abahnya. “Pukuknya ulun handak suntik putih! Handak sugih! Handak uprasi palastik supaya bungas!” Ujar Utuh. “Ai nah kanapa ikam. Aja kena aku manyuntik ikam pakai cat air nang warna putih tu, kalu pang mau baputih. Amun handak uprasi palastik tuh nah uma ikam banyak baisian palastik gula lawan palastik nang bakas manukar minyak lamak tuh,” ujar Abahnya kada tetahu muha. Lalu banyaring ai si Utuh Gaul manangis.

Umanya nang mulai tadi batatapas di balakang langsung ka luar mandangar urang pina abut-abut. “Kanapa ikam manangis Tuh?” ujar Umanya. “Nih si Utuh handak sugih jar, handak suntik putih lawan uprasi palastik supaya babungas,” ujar Paman Amat mangisahakan. “Ai ikam, aku gin handak jua mulai bahari jaka baduit, bagawi ai dulu ikam supaya sugih. Jangan kaya abah ikam nih,” ujar Umanya salajur manyinggung. Dipusuti umanya balakang Utuh nang lagi manangis nih.

Tapi ngarannya utuh ni karas, tatap ai Si Utuh manangis. “Pukuknya ulun handak!” ujar Utuh. “Nah ulun ada dipadahi kawan ulun samalam Bah ai, ada dukun nang bagana di parak sungai hujung dusun kita nih, cubai pang kasana. Ujar kawan ulun disana lagi diskun 80%,” jar bini Paman Amat. “Ayu kasi nah Tuh, kita kasana wahinian,” ujar Paman Amat.

“Ngaran ikam pasti Amat lawan Utuh Gaul kalo?” Ujar dukun nih. “Inggih bujur,” jar Paman Amat. “Dasar sakti dukunnya ngini, tahu ngaran kita,” Ujar Paman Amat mamandiri Utuh. “Hiih Bah ai,” ujar Utuh pina manunduk lawan dukunnya. Jadi dalam hati dukun nih, “aku toh sakampung lwn ikam. Bahari pas ikm hnyar pindah sampat bakanalan lawan aku. Kada ingat kah ikam,” tapi dukun ni tatawa aja, kd handak mamadahi pada pernah bakanalan.

Mbah bulik matan rumah dukun, Paman Amat ni dapat tiga biji batu nang kawa mangabulakan apa haja nang dikahandaki bila ditimbaiakan ampah ka langit sambil manguciakakan apa nang dikahandaki. Langsung ai Paman Amat ni mancubai, “Tuh, kita baimbaian lah bakuciak handak sugih, kena nang kadua hanyar bakuciak bungas, nang katiga kena hanyar putih” ujar sidin. “Inggih bah ai,” Ujar Utuh. *betungak* “HANDAK SUGIIIIIIIH..” Ujar nang badua nih. “HIDUNG HIDUNG HIDUNG,” jar Paman Amat malihat Utuh pina batungak banar, takutan ai sidin kalopina kana hidung Utuh Gaul, jadi sambatan sidin nang “handak sugih” tadi tasambung lawan “hidung hidung hidung” tadi. Habis am Muha sidin lawan anak sidin hibak hidung haja. Napang sugih hidung kalu jar tadi.

“Uma bah, magin kd bungas ulun kaini,” ujar Utuh pina pusang. “Aja aja ini ikam jangan umpat batungak lagi lah. Aku ja nang bakuciaknya nah,” ujar Paman Amat. “HILANGAKAN HIDUUUUNG!” ujar Paman Amat bakuciak. Sakalinya napa nah? Hidung sidin nang di muha hilangan, sampai nang asli ja kadeda lagi, kada bahidung lagi nang badua baranak nih. “Uma bah, magin ngeri ulun kaini,” ujar Utuh magin pusang. “Ay maap nak, maap. Aja baasa nah aku maminta hidung. BULIKAKAN HIDUNG KAMI SABUTING!” ujar paman Amat. “Bah nang tadi tu batu nang tarakhir kalu? Umaaa ulun kada jadi bungas lah, pian ngini pang. Maka duit SPP sakulah ulun dipakai ha pulang gasan ka dukun. Sugih kada jadi, bungas kada jadi, putih kada jadi jua te. Kakayaini ai kita. Mbah tu pang kayapa ulun bayar SPP?!” Pusang banar si Utuh mamikirakan hidupnya nang pina kada kakaruan gara-gara dukun.

Amanat:

• Jangan pengoler begawi, apalagi ngitu dasar kewajiban sorang sabagai kapala kaluarga
• Bila hdk sugih tu bedoa ke Allah  supaya dibari sidin rejeki lawan jua harus bausaha tarus supaya kawa lakas sugih, jgn ke dukun
• Mun hdk bungas tu rancaki membaca sholawat lawan bewudhu jar
• Mun hdk putih jgn bepanas ai, jangan pengoler mandi :&
• Mengarani anak tu yang bagus, supaya kada menyupani anaknya. Lawan jua cari yang artinya bagus wan barmutu, jangan kaya Utuh Gaul
• Batasi anak manuntun TV yg acaranya bisa marusak akhlak inya. Labih baik jngan dibolehakan nonton sinetron yg bapacaran2 tuh, kada bagus gasan kakanakan apalagi masih SD kaya Utuh Gaul nih
• Anak tu dilajari agama mulai lagi bayi. Pas inya guring tu labih baik disyairakan syair2 agama daripada lagu dangdut. Harau am ganalnya jadi kecintaan lawan dangdut aja

Nah itu aja ceritanya, semoga membantu dan menghibur ya